Халыққа тегін медициналық және құқықтық көмек көрсететін медпойыз Жетісу және Алматы облыстарына барады

"Саламатты Қазақстан" медициналық пойызы Жетісу және Алматы облыстарының тұрғындарына тегін көмек көрсетеді. Облыстарда болған уақытта дәрігерлер мен заңгерлер 8 ауылдың және жақын маңдағы елді мекендердің тұрғындарына қызмет ұсынады.

Маршрут 1 желтоқсанда Алтынкөл ауылынан басталады. Пойыз Жоламан, Малайсары, Айнабұлақ, Көксу, Кәлпе, Егінсу және Лепсі станцияларында аялдайды.

Алтынкөл ауылында пойыз 1-2 желтоқсан күндері жұмыс істейді, Жоламан ауылында – 3 желтоқсан, Малайсарыда – 4 желтоқсан, Айнабұлақта – 5 желтоқсан.

Көксу тұрғындары 6-7 желтоқсан күндері кеңес ала алады, Кәлпе – 8-9 желтоқсан, Егінсу – 10 желтоқсан, Лепсі – 11-12 желтоқсан күндері.

Қабылдауды негізгі бағыттар бойынша дәрігерлер жүргізеді: терапия, хирургия, педиатрия, кардиология, неврология, оториноларингология, офтальмология, стоматология, гинекология, урология, функционалдық диагностика, рентген және психология.

Кеңестерден бөлек, вагондарда УДЗ, ЭКГ, флюорография, гастрофиброскопия жасауға, лабораториялық анализдер тапсыруға және басқа да тексерулерден өтуге болады. Қажет болған жағдайда дәрігерлер шағын хирургиялық араласуларды да жүзеге асырады. Барлық санитарлық және техникалық нормалар сақталған: пойыз заманауи жабдықтармен қамтамасыз етілген.

Дәрігерлермен қатар, ауыл тұрғындарына құқықтық кеңес беру үшін заңгерлер мен медиаторлар да жұмыс істейді. Олар Қазақстан Республикасы Президентінің жанындағы Әйелдер істері және отбасылық-демографиялық саясат жөніндегі Ұлттық комиссияның атынан қызмет көрсетеді.

Мамандар еңбек дауларын шешуге, әлеуметтік төлемдерді рәсімдеуге және соттық және құқықтық процедураларды түсіндіруге көмектеседі.

Қазіргі уақытта пойыз елдің шалғай ауылдарының 77 225 тұрғынына қызмет көрсетті. Олардың 43 657-сі – әйелдер.

Жоба ҚР Президентінің жанындағы Әйелдер істері және отбасылық-демографиялық саясат жөніндегі ұлттық комиссия, Samruk-Kazyna Trust корпоративтік қоры және Денсаулық сақтау министрлігі серіктестігімен жүзеге асырылуда.

Медициналық пойыздың қозғалыс кестесі www.medpoezd.kz сайтында жарияланған.