Алматы облысы халықаралық ынтымақтастықты нығайтуда

Алматы облысы инвестициялық тартымдылығын жүйелі түрде арттырып, шетелдік капиталды тартудың негізгі орталықтарының бірі ретінде қалыптасуда.

Өнеркәсіптік кооперацияны дамыту аясында Беларусь инвесторлары өңірде жол таңбалау материалдарын өндіретін заманауи зауыт салу жобасын іске асыруды жоспарлап отыр.

Алматы қаласында Беларусь Республикасының Бас консулдығының ашылуы аясында «Алматы облысының өңірлік даму орталығы» ЖШС мен беларусьтік «СТиМ-АЗИЯ» ЖШС арасында ынтымақтастық туралы меморандумға қол қоюдың салтанатты рәсімі өтті. Меморандумның мәні — серіктестік қатынастарды орнату және жобаны іске асыруға қажетті іс-шаралар кешенін айқындау.

Алматы облысының өңірлік даму орталығы директоры Ақжол Исаков мұндай жобаларды іске асыру халықаралық серіктестермен тиімді өзара іс-қимылды қалыптастыру және инвесторлар үшін қолайлы жағдай жасау бойынша жүйелі жұмыстың нәтижесі екенін атап өтті.

«Алматы облысы халықаралық ынтымақтастыққа және инвестиция тартуға ашық. Аталған жобаны іске асыру сұранысқа ие өнім өндірісін жергіліктендіруге, импортқа тәуелділікті төмендетуге және жаңа жұмыс орындарын құруға мүмкіндік береді. Өңірлік даму орталығы тарапынан инвесторға жобаны іске асырудың барлық кезеңдерінде жан-жақты қолдау көрсетіліп, сүйемелдеу қамтамасыз етіледі».

Осылайша, қол қойылған меморандум қол жеткізілген уағдаластықтарды іс жүзінде іске асыруға және ынтымақтастықты жаңа деңгейге шығаруға негіз қалайды.

Беларусь Республикасының Бас консулдығын ашу рәсіміне Беларусь Республикасының Қазақстан Республикасындағы Төтенше және Өкілетті Елшісі Алексей Богданов, Беларусь Республикасының Сыртқы істер министрі Максим Рыженков, Қазақстан Республикасы Сыртқы істер министрінің орынбасары Ермұхамбет Қонуспаев, сондай-ақ екі елдің мемлекеттік органдары мен іскер топтарының өкілдері қатысты.

Қол жеткізілген уағдаластықтарды іске асыру өнеркәсіптік кооперацияны дамыту мен Қазақстан мен Беларусь арасындағы экономикалық байланыстарды нығайтудың нақты қадамына айналады.

Жоба өңірдің өндірістік әлеуетін кеңейтіп, оның өнеркәсіптік ынтымақтастықтағы позициясын күшейтіп, Алматы облысының халықаралық инвестициялық жобаларды іске асыру үшін сенімді алаң екенін тағы бір мәрте дәлелдейді.