Мемлекет басшысы GREEN ECO жылыжай кешенімен және жасыл өндіріс нысандарымен танысты

Мемлекет басшысы Қасым-Жомарт Тоқаев жұмыс сапары барысында заманауи агроөнеркәсіптік және жасыл инфрақұрылым нысандарының қызметімен танысты,деп хабарлайды Qonaev-gorod.

Президент GREEN ECO жылыжай кешеніне барып, экологиялық таза өнім өндіру процесін және кәсіпорында қолданылатын жаңа технологияларды көрді.

GREEN ECO кешенінде жапырақты көкөністер өсіріледі. Мұнда өндіріс толықтай экологиялық талаптарға сай ұйымдастырылған: химиялық өңдеу құралдары, минералды тыңайтқыштар мен пестицидтер қолданылмайды.

Бұл тәсіл өнімнің табиғилығы мен сапасын қамтамасыз етуге бағытталған.

Кәсіпорынның өндірістік қуаты тұрақты түрде артып келеді. Бүгінде жылыжай кешенінде 160-қа жуық адам жұмыс істейді. Өндірілген өнім Қазақстанның 10 қаласына жеткізіліп, ішкі нарықтағы сұранысты қамтамасыз етіп отыр.

Сапар барысында Президент "Лукоморье" тұқымбағы – бақ орталығының жұмысымен де танысты. Бұл орталық автоматтандырылған жүйелер арқылы басқарылып, жылына 1,5 миллионға дейін ағаш көшеті, сәндік бұталар мен гүл өсіруге мүмкіндік береді. Тұқымбақ өнімдері еліміздің түрлі өңірлерінде кеңінен қолданылады, сондай-ақ Өзбекстан мен Қырғызстанға экспортталады.

Сонымен қатар Мемлекет басшысына Turanga сәндік өсімдіктер тұқымбағын дамыту жобасы таныстырылды. Жоба аясында 130 мың ағаш пен 3,5 миллион түп бұта өсіру жоспарланып отыр. Бұл бастама қалаларды көгалдандыруды арттырып, экологиялық ортаны жақсартуға бағытталған.

Мамандардың айтуынша, аталған жобалар еліміздегі жасыл экономиканы дамытуға, ауыл шаруашылығында заманауи технологияларды енгізуге және экологиялық мәдениетті қалыптастыруға ықпал етеді.