Данияр Почивалов Азия ойындарында Қазақстан қоржынына қола медаль салды

Жапонияда ХХ жазғы Азия ойындарының жарыстары жалғасуда.

Бүгін қазақстандық спортшылар стенд атудың "трап" дисциплинасы бойынша ерлер арасындағы командалық сайыста жүлдеге ие болды.

Қазақстан құрамасы сапында Данияр Почивалов, Алишер Айсалбаев және Марк Почивалов өнер көрсетті. Біліктілік кезеңінің қорытындысы бойынша қазақстандық команда 348 ұпай жинап, үшінші орынға ие болды.

• 1-орын — Кувейт — 355 ұпай
• 2-орын — Катар — 349 ұпай
• 3-орын — Қазақстан — 348 ұпай

Қола жүлдегерлердің бірі — Алматы облысының өкілі Данияр Почивалов. Халықаралық дәрежедегі спорт шебері «трап» дисциплинасына маманданған және әлемдік аренада өнер көрсету тәжірибесі мол.

22 жастағы спортшы — 2023 жылғы әлем чемпионатының қола жүлдегері, ұлттық жарыстар мен ірі халықаралық додалардың жеңімпазы әрі жүлдегері.

Осы Азия ойындарында Данияр Почивалов алғашқы сыннан-ақ жеке бәсекеде де өз мүмкіндігін көрсетті. Ерлер арасындағы «трап» біліктілігінің бірінші күнінде ол 48 нысананы дәл көздеп, үшінші орында болды. Екінші күннің қорытындысы бойынша оның нәтижесі 93 ұпайды құрады.

Командалық есепте жеңіп алған бұл медаль — Данияр Почиваловтың спорттық жолындағы тағы бір жарқын белес. Бұл — жаттығудағы табанды еңбектің, жоғары дәлдік пен төзімділіктің нәтижесі.

"Трап" дисциплинасы бойынша жеңіп алынған қола медаль Қазақстанның стенд атудан Азия ойындарындағы кезекті жетістігіне айналды. Ал Алматы облысы үшін бұл — ұлттық құрама сапындағы өз өкілімен мақтануға тағы бір себеп.

Тоғызыншы жарыс күнінің қорытындысы бойынша Қазақстан құрамасының қоржынында 45 медаль: 9 алтын, 13 күміс және 23 қола болды. Қазақстан жалпыкомандалық медальдар есебінде бесінші орында тұрды.

Алда Азия ойындарының тағы бірнеше жарыс күні бар. ХХ жазғы Азия ойындары Жапонияда 4 қазанға дейін жалғасады.

Лилиана Штогрина