"Әлеуметтік медициналық сақтандыру қоры" КЕАҚ Алматы облыстық филиалы өкілдері аймақтағы әлеуметтік сала қызметкерлерімен кездесті.
Ұжымға пациент құқығы, Пациенттерді қолдау қызметі, емханаға тіркелу, МӘМС аясындағы медициналық көмек тізімі түсіндіріліп, сақтандыру мәртебесінің маңызы айтылды.
"Әлеуметтік медициналық сақтандыру қоры азаматтарды өз құқығын қорғауға белсенді болуға шақырады. Себебі уақытылы жүгінген кезде әділдікті қалпына келтіріп қана қоймай, жалпы денсаулық сақтау жүйесін жақсартуға да ықпал етеді. Қор диалогқа ашық және азаматтарды олардың құқықтары бұзылған немесе медициналық қызметтерден бас тартылған жағдайлар туралы хабарлауға шақырады.
Кез келген жағдайда сіз пациенттерді қолдау қызметіне жүгіне аласыз немесе Call орталық -1414, Qoldau 24/7 мобильдік қосымшасы, Қордың сайты, бот Сактандыр жеделхаттары арқылы медициналық сақтандыру қорына жүгіну қажет", - деді жиында сөз алған филиалдың бас сарапшысы Айғаным Санақбаева.
Жиында МӘМС жүйесіндегі жаңашылдықтар, яғни халықты жүйемен барынша қамтуға мүмкіндік беретін жаңа шаралар туралы кеңінен әңгімеленді.
Мәселен, енді жергілікті атқарушы органдар әлеуметтік әл-ауқат деңгейі бойынша дағдарыстық және шұғыл жағдайдағы (D және E деңгейі) санаттарына жататын азаматтар үшін МӘМС жарналарын төлейтін болады.
Осы шаралардың нәтижесінде елімізде 2026 жылы шамамен 1 миллион адам МӘМС жүйесімен қосымша қамтылмақ. Сонымен қатар, ресми тіркелген жұмыссыздар үшін де жарналар жергілікті бюджет есебінен төленетін болады.
"Қабылданған өзгерістерге сәйкес, онкологиялық скринингтер 2026 жылдан бастап ТМККК тізіміне өтті және МӘМС жүйесінде сақтандырылған мәртебесіне қарамастан барлық азаматтар үшін тегін болды.
Сондай-ақ, 8 әлеуметтік мәні бар ауруға (туберкулез, АИТВ, созылмалы вирусты гепатиттер мен бауыр циррозы, қатерлі ісіктер, психикалық және мінез-құлықтық бұзылыстар, орфандық аурулар, жедел миокард инфаркті, инсульт) күдік туындаған жағдайда консультативтік-диагностикалық көмек те тегін көрсетілетін болады. Бұған дейін мұндай көмек тек АИТВ мен туберкулезге күдік болғанда ғана ұсынылатын", - деді спикер филиал директорының орынбасары Жанар Кенжебаева.
Өз кезегінде жиында ұжым тарапынан бірқатар сұрақ қойылып, талқыланды. Мамандар жалған жазба, сапасыз медициналық көмек, сақтандыру мәртебесінің мүмкіндіктері туралы сұрасты. Өз кезегінде спикерлер тарапынан тұшымды жауап берілді.
Айта кетерлігі, Алматы облысында қормен келісімшарт жасасқан 77 медициналық ұйым бар. Тек мемлекеттік ғана емес, жекеменшік емханалар да пациенттерге қызмет көрсетіп келеді. Олардың барлығында Пациенттерді қолдау қызметі жұмыс істеп тұр.