Қазақстандық биатлоншылар Милан мен Кортина-д’Ампеццода өткен XXV қысқы Олимпиада ойындарындағы өнерлерін аяқтады. Алматы қаласының халықаралық әуежайында спортшыларды салтанатты түрде қарсы алу рәсімі өтті.
Олимпиадашыларды қолдап, құттықтауға облыстық дене шынықтыру және спорт басқармасының өкілдері, жаттықтырушылар құрамы, туған-туыстары мен жанкүйерлер жиналды.
Еске салсақ, Қазақстан құрамасы биатлоннан төрт олимпиадалық жолдама иеленді. Соның үшеуі Алматы облысының спортшыларына тиесілі болды. Олар — 23 жастағы Айша Ракишева мен 21 жастағы Милана Генева. Екі спортшы үшін де бұл Олимпиада — мансаптарындағы алғашқы дода болса, Алматы облысы үшін маңызды жетістік саналады. Сондай-ақ ұлттық құрама сапында биатлоннан халықаралық дәрежедегі спорт шебері Әсет Дүйсенов те өнер көрсетті. Үшеуі де Алматы облысының «Қысқы спорт түрлері бойынша мамандандырылған балалар-жасөспірімдер спорт мектебінің» түлектері.
Олимпиадалық бағдарлама биатлоннан аралас эстафетамен басталды. Бұл сайыста Қазақстан намысын Владислав Киреев, Әсет Дүйсенов, Милана Генева және Айша Ракишева қорғады. Команда 21-нәтижемен мәре сызығын кесті.
Ерлер арасындағы 20 шақырымдық жеке жарыста Әсет Дүйсенов 74-орын алды.
Әйелдер арасындағы 15 шақырымдық жеке жарыста Айша Ракишева 86-орынға тұрақтаса, Милана Генева 89-нәтижемен жарысты аяқтады.
Биатлоншылар өз кезегінде жанкүйерлер мен мамандарға ыстық ықыластары үшін алғыс білдірді. Олар Олимпиададағы әсерлерімен бөлісіп, алда жарыстарды сараптау, қателіктермен жұмыс және жаңа халықаралық бәсекелерге дайындық күтіп тұрғанын айтты.
Айта кетейік, Италияда өтіп жатқан қысқы Олимпиада ойындарында Қазақстан намысын барлығы 36 спортшы қорғауда. Төрт жылда бір өтетін дүбірлі додаға 95 елден 2871 атлет қатысуда. 22 ақпанға дейін жалғасатын жарыс бағдарламасына 16 спорт түрі бойынша 116 медаль жиынтығы енгізілген.