Алматы қаласында 50 жастан асқан әйелдер арасында өткен республикалық волейбол турнирі өз мәресіне жетті. Бұл жарыс спортқа деген сүйіспеншіліктің жасқа тәуелді еместігін тағы бір мәрте дәлелдеді.
Турнир тартысты ойындарға, шынайы эмоцияларға және волейболды өмірінің ажырамас бөлігіне айналдырған жандардың басын қосқан жарқын спорт мерекесіне айналды.
Жарыс алаңына Алматы облысының әртүрлі аудандарынан, сондай-ақ Алматы және Шымкент қалалары мен Жетісу облысынан келген 9 команда шықты.
Турнир ардагер спортшылар арасында волейболды кеңінен насихаттауға, салауатты әрі белсенді өмір салтын дәріптеуге, сондай-ақ аға буын өкілдерінің дене шынықтырумен тұрақты айналысуына жағдай жасауға бағытталған «Достар лига» спорттық жобасы аясында ұйымдастырылды.
Мамандардың айтуынша, волейбол жүрек-қан тамырлары жүйесін нығайтуға, қозғалыс үйлесімділігін, төзімділікті және психоэмоционалдық саулықты сақтауға ықпал етеді. Бұл әсіресе егде жастағы адамдар үшін аса маңызды.
«Достар лига» жобасына деген қызығушылық жыл сайын артып келеді. Командалар саны көбейіп, қатысушылардың географиясы кеңеюде. Бұл жарыстар үздіктерді анықтап қана қоймай, өңірлер арасындағы достық қарым-қатынасты нығайтатын маңызды алаңға айналып отыр. Қатысушылардың көпшілігі жастайынан волейболмен айналысқан. Сондықтан олардың бүгін де спорт алаңына шығып, достарымен кездесіп, жарыстың қызығын көруге мүмкіндік алып отырғаны өте маңызды.
Осындай турнирлер зор күш-қуат сыйлап, денсаулықты нығайтуға ықпал етеді және елу жастан кейін де спорттық өмірдің жалғасатынын дәлелдейді», – деді жарыстың бас төрешісі Гүлзара Ниязова.
Барлық кездесулер Халықаралық волейбол федерациясының (FIVB) ресми ережелеріне сәйкес өткізілді. Қатысушылар жоғары дайындық деңгейін, тактикалық сауаттылығын және нағыз спорттық мінезін көрсетті.