Жаңа оқу жылына дайындық: Қонаевта "Мектепке жол" жәрмеңкесі өтті

Құрылтай сайлауы өтіп жатқан күні Қонаев қаласында республикалық «Мектепке жол» акциясы аясында мектеп тауарларының жәрмеңкесі ұйымдастырылды.

Игі бастама жаңа оқу жылы қарсаңында ата-аналарға қолдау көрсетіп, балаларды оқу жылына қажетті заттармен қамтамасыз етуге бағытталды.

Жәрмеңкеде қала тұрғындары оқушыларға арналған қажетті тауарларды бір жерден алып, жаңа оқу жылына дайындық жұмыстарын ыңғайлы әрі қолжетімді бағамен жүргізуге мүмкіндік алды.

Іс-шара барысында мектеп формасы, кеңсе тауарлары, оқушы сөмкелері, оқу құралдары және оқу жылына қажетті басқа да тауарлар ұсынылды. Сауда орындарында оқушылардың жас ерекшелігі мен қажеттілігіне сай түрлі өнімдер қойылды.

Қонаевтағы жәрмеңкенің Құрылтай сайлауымен тұспа-тұс өткізілуі қала тұрғындарының қоғамдық белсенділігі мен әлеуметтік бастамалардың қатар өрбуін көрсетті. Сайлауға келген тұрғындар жәрмеңкеге де қатысып, мектепке қажетті тауарларды сатып алу мүмкіндігіне ие болды.

Ұйымдастырушылардың айтуынша, мұндай шаралар ата-аналар үшін оқу жылына дайындықты жеңілдетіп қана қоймай, балалардың білім алуға қажетті жағдайын алдын ала жасауға мүмкіндік береді.

Жаңа оқу жылы қарсаңында «Мектепке жол» акциясы аясындағы іс-шаралар балаларға қолдау көрсетуге, олардың білім алуға деген ынтасын арттыруға және әр оқушының мектепке қажетті құрал-жабдықпен қамтамасыз етілуіне бағытталған.

Сайт города Конаев