18+

Қонаевта жас дзюдошылардың республикалық бәсекесі басталды

17:30, 12 сентября
Дзюдо
Спорт
Надежный источник

Қонаев қаласында Қазақстан Республикасының спорт шебері Айдын Торғауытовты еске алуға арналған дзюдодан республикалық турнир басталды.

Татамиге 2010–2011 жылдары туған жас дзюдошылар шықты. Екі күнге созылатын жарысқа еліміздің әр өңірінен келген спортшылар қатысып, шеберліктерін шыңдап, жарыс тәжірибесін жинақтауда.

Жарысқа 150-ден астам ұл мен қыз қатысуда. Спортшылар арасында 17 жүлде жиынтығы сарапқа салынады. Ұлдар 38 келіден 73 келіден жоғары салмақ дәрежесіне дейінгі тоғыз санат бойынша, ал қыздар 36 келіден 63 келіден жоғары салмақ дәрежесіне дейінгі сегіз санатта бақ сынайды.

Белдесулер басталмас бұрын турнирдің салтанатты ашылу рәсімі өтті. Қатысушыларды, жаттықтырушылар мен жарыс қонақтарын ұйымдастырушылар мен құрметті қонақтар құттықтады. Олардың қатарында Айдын Торғауытовтың ата-анасы мен жақын туыстары да болды. Олар жас спортшыларға әділ белдесу мен жарқын жеңістер тіледі.

Турнирді ұйымдастырушы Асқар Көшербаев спортшыны еске алуға арналған жарыстың маңызы зор екенін атап өтті. Оның айтуынша, мұндай сайыстар Айдын Торғауытовтың есімін ұлықтап қана қоймай, жас дзюдошыларға спорттың маңызды құндылықтарын насихаттауға мүмкіндік береді.

«Бұл турнирді екінші жыл қатарынан өткізіп отырмыз. Былтыр жарыс облыстық деңгейде өтсе, биыл республикалық мәртебеге ие болды. Алматы облысының балуандарынан бөлек, Қонаев қаласына Қазақстанның тағы төрт өңірінен спортшылар келді. Барлығы да жеңіске деген жоғары мақсатпен келді.

Биыл жарыс күнтізбелік жоспарға енгізілді. Оның жеңімпаздары мен жүлдегерлері Қазақстан Республикасының спорт шеберлігіне кандидат атағына үміткер бола алады.

Біз үшін бұл турнир — ең алдымен Айдын Торғауытовты және оның спорттағы жолын құрметтеу. Дзюдоның дамуына үлес қосқан спортшылардың есімін жас ұрпақ білуі өте маңызды. Бүгін татамиге шыққан әр жас спортшы үшін әр белдесу — шыңдалудың, тәжірибе жинаудың және мықты бола түсудің мүмкіндігі», — деді жарыс ұйымдастырушысы Асқар Көшербаев.

Айдын Торғауытов самбо мен дзюдодағы алғашқы қадамын туған жері Шеңгелді ауылында жасады. 13 жасында Алматы қаласындағы спортқа дарынды балаларға арналған мектеп-интернатқа қабылданды. Жас кезінен-ақ елеулі спорттық жетістіктерге жетіп, жастар арасындағы әлем және Еуропа чемпионаттарының жүлдегері атанды.

Ұлының спорттағы мінезі мен үлкен жеңістерге деген ұмтылысы туралы әкесі Тілепбалды Торғауытов айтып берді.

«Менің ұлым әрдайым әлемдік тұғырды бағындыруды армандады. Мінезі сабырлы әрі жуас болғанымен, өте табанды еді. Көп жаттықты, еңбектенді және сәтсіздіктерге мойығысы келмейтін.

Осы турнирді ұйымдастырып жүрген азаматтарға, оның ішінде жақын достары мен шәкірттеріне алғысымды білдіремін. Осындай жарыстардың арқасында ұлымның есімі мен рухы ұлықталып, оның жарқын бейнесі халық жадында сақталып келеді», — деді Тілепбалды Торғауытов.

Жас спортшылар үшін мұндай турнирлердің маңызы зор. Олар әртүрлі өңірлерден келген мықты қарсыластармен белдесіп, дайындық деңгейін сынауға және нағыз спорттық бәсекеде өз мүмкіндіктерін бағамдауға мүмкіндік алады.

Қатысушылар қатарында Айдын Торғауытовтың қызы — Айым да бар. Ол татамиде өз шеберлігін көрсетіп, турнирдің күміс жүлдегері атанды.

«Мен бұл турнирді асыға күттім. Бұл — мен үшін ерекше жарыс. Әкемнің рухына арнағым келіп, бар күшімді салып күрестім. Тіпті қолымды жарақаттап алдым, бірақ соған қарамастан соңына дейін күресіп, жүлдеге қол жеткіздім.

Әкем сияқты танымал спортшы болғым келеді. Қазақстанның туы әлемдік деңгейде көкке көтеріліп, елімнің Әнұраны мүмкіндігінше жиі шырқалса екен деп армандаймын», — деді Айым Тілепбалды.

Алда спортшыларды ең тартысты белдесулер күтіп тұр. Дәл осы кездесулерде жүлдегерлер анықталып, медальдардың тағдыры шешіледі.

Лилиана Штогрина

Сайт города Конаев