XX жазғы Азия ойындары – Aichi–Nagoya 2026 аясындағы жарыстар жалғасуда.
Бүгін Қазақстанның ушу-саньда тарихында айтулы оқиға орын алды. Ұлттық құрама сапында Алматы облысының намысын қорғаған Әлижан Аблагатов ел қоржынына осы спорт түрінен Азия ойындарындағы алғашқы медальді салды.
70 келіге дейінгі салмақ дәрежесінде өнер көрсеткен қазақстандық спортшы жартылай финалда Иран өкілі Ерфан Мохаррами Пирагноммен кездесті. Тартысты жекпе-жекте ирандық спортшы жеңіске жетті. Жарыс ережесіне сәйкес, жартылай финалда жеңілген спортшылар қола жүлдегер атанады.
Осылайша, Әлижан Аблагатов XX жазғы Азия ойындарының қола жүлдесін иеленіп, Қазақстанға ушу-саньдадан Азия ойындары тарихындағы тұңғыш медальді әкелді.
Бұл жетістік Алматы облысы үшін де айрықша мәнге ие. Жеңістің артында талай жылғы жаттығу, тынымсыз еңбек және халықаралық аренада жинақталған мол тәжірибе жатыр.