Алматы облысының жас балуандары Қазақстан чемпионатында үздік үштікке енді

2013–2014 жылы туған жасөспірімдер арасында қазақ күресінен Қазақстан республикасының чемпионаты аяқталды.

«Үшқоңыр» спорт кешенінің бозкілемінде еліміздің 20 өңірінен келген жас балуандар бас қосты. Барлығы 230 спортшы он салмақ дәрежесінде: 32, 35, 38, 42, 46, 50, 55, 60, 65 келі және 65 келіден жоғары салмақ дәрежелерінде ел үздіктері атану үшін бақ сынады.

Әрбір белдесу жас балуандардың физикалық дайындығын, техникалық шеберлігін және қайсар мінезін сынға салды.

Чемпионатқа қатысушылар спорттық қалыптасудың маңызды кезеңінен өтуде. 12–13 жас аралығында олар күрес әдістерін меңгеріп, қимыл үйлесімділігін, төзімділігін және тактикалық ойлау қабілетін белсенді түрде дамытады.

Жасөспірімдер үшін мұндай жарыстар тек медаль үшін күрес қана емес, сонымен қатар үлкен спорттың атмосферасын сезінуге, мықты қарсыластармен белдесіп, өз мүмкіндіктерін сынауға және спорттық армандарына қарай тағы бір қадам жасауға жол ашады.

Жарыстың жеңімпаздары мен жүлдегерлері қатарында Алматы облысының өкілдері де бар. Атап айтқанда, Бекарыс Жарылқасынұлы мен Диас Жолдыбай күміс жүлдеге ие болды. Ал Әлібек Нұржанұлы 55 келіге дейінгі салмақ дәрежесінде қола жүлдені иеленді.

Жалпы командалық есеп бойынша жүлделі орындар төмендегідей бөлінді:

• I орын — Түркістан облысы (111 ұпай);
• II орын — Астана қаласы (104 ұпай);
• III орын — Алматы облысы (96 ұпай).

Лилиана Штогрина