Алматы көпсалалы клиникалық ауруханасының офтальмологтары Ақтау тұрғынының көру қабілетін қалпына келтірді

Ақтау қаласының тұрғыны кенеттен көзінің көруін жоғалтты — көз алды қарауытып, мүлдем көрмей қалды. Дәрігерлер оған көру жүйкесі невриті деген қауіпті диагноз қойды.

Бұл – дер кезінде емделмесе, толық соқырлыққа әкелетін ауру. Мамандардың кеңесімен ол шұғыл түрде Алматыға ұшып келіп, Қазақ көз аурулары ғылыми-зерттеу институтына жүгінді.

Институт мамандары науқастың жағдайы күрделеніп бара жатқанын байқап, тез арада ауруханаға жатуды ұсынды. Осылайша ол Алматы көпсалалы клиникалық ауруханасына жеткізілді. Офтальмология бөлімінің меңгерушісі, жоғары санатты дәрігер Айжан МАҒАЗОВА науқасты ауруханаға жатқызып, қажетті ем-домды жүргізді.

Операция Міндетті әлеуметтік медициналық сақтандыру (МӘМС) жүйесі аясында тегін жүргізілді.

Ем қабылдағаннан кейін жетінші күні-ақ науқастың көру қабілеті жақсара бастады. Жағдайы тұрақтанғаннан кейін ол үйіне шығарылды.

Дәрігерлердің кәсібилігі мен дер кезінде көрсетілген көмектің арқасында күрделі асқынулардың алдын алып, көру қабілетін сақтап қалу мүмкін болды.