Алматы облысында спорт саласының мамандары арасында "SPORT GAMES – 2026" өтті

Алматы облысының орталығында Қазақстан Республикасының Спорт күніне орай спорт мекемелерінің қызметкерлері арасында «SPORT GAMES – 2026» спартакиадасы өтті.

Оған облыстың спорт ұйымдарынан 30 команда, яғни 400-ден астам өкіл қатысып, жеңіс үшін бақ сынап, өздерінің физикалық дайындығын саралады.

«Бүгін мұнда Алматы облысында спортты күн сайын дамытып жүрген азаматтар жиналып отыр. Алайда бүгін сіздер ұйымдастырушы да, төреші де емессіздер – өздеріңіз спорттық додаға қатысушысыздар. Бұл – аса маңызды. Мұндай жарыстар командалық рухты нығайтып, спорттың ең алдымен жеке үлгіден басталатынын әрқайсымызға еске салады.

Баршаңызға әділ бәсеке, жарқын эмоциялар мен лайықты жеңістер тілеймін. Бүгін мықтылар жеңсін, ең бастысы – әрбір қатысушы жақсы көңіл күй мен жаңа күш-қуат алсын», – деді жарыстың салтанатты ашылуында қатысушыларды кәсіби мерекелерімен құттықтаған Алматы облысының дене шынықтыру және спорт басқармасының басшы міндетін атқарушы Жансерік Әдиахметов.

Кешенді жарыстар спорттың жеті түрінен өтті. Орталық Қонаев қаласындағы жағажайда орналасқан «Кроссфит» спорт алаңында жағажай волейболы, стритбол, мас-рестлинг және армрестлингтен сайыстар ұйымдастырылды. Ал облыстық спортты дамыту дирекциясының стадионында дойбы, арқан тарту және шағын футболдан турнирлер өтті.

Әрбір спорт түрі қатысушылардан ерекше дайындық пен мінезді талап етті.

Жағажай волейболында құмды алаңдағы күрделі жағдайда жылдамдық, шапшаң реакция және командалық үйлесімділік маңызды болса, стритболда тактика мен лезде шешім қабылдау қабілеті шешуші рөл атқарды.

Мас-рестлинг қатысушылардың күшін және төзімділігін сынап, жеңісті тек физикалық қуат емес, дұрыс техника да айқындады. Ал армрестлингте басты сынақ – бірнеше секундтың ішінде күшті барынша жұмылдырып, қарсыластың қысымына төтеп беру болды.

Ерекше командалық тартыс арқан тартудан байқалды. Бұл спорт түрінде жеке күштен гөрі бүкіл команданың бірлігі мен үйлесімділігі маңызды. Шағын футболда қатысушылар жылдамдық, тактикалық ойлау және ойын барысында төзімділік танытты. Ал дойбы турнирі тек физикалық күшпен емес, дәл есеп пен байыпты ойлау арқылы жеңіске жетуге дағдыланғандар үшін нағыз сынақ болды.

«SPORT GAMES – 2026» спартакиадасын Алматы облысының дене шынықтыру және спорт басқармасы мен Алматы облысының «Бұқаралық спорт клубы» КММ ұйымдастырды.

«Алматы облысында бұқаралық спортты дамыту жұмыстары жүйелі түрде жүргізіліп, халықты дене шынықтырумен тұрақты айналысуға тарту үшін қажетті жағдайлар жасалуда. Спортқа деген қызығушылықтың артып келе жатқанын көріп отырмыз. Мұндай іс-шаралар денсаулықты нығайтумен қатар, спорттық мәдениетті қалыптастыруға да ықпал етеді», – деді Алматы облысының «Бұқаралық спорт клубы» КММ директоры Қайыржан Бейсембетов.

Спартакиада Қазақстан Республикасының Спорт күніне арналған ауқымды іс-шаралар бағдарламасының бір бөлігіне айналып, өңірдегі спорт жетістіктері жоғары нәтижелер көрсетіп жүрген спортшылардың ғана емес, спортты дамытуға жағдай жасап, оның негізін жергілікті деңгейде нығайтып жүрген мамандардың күнделікті еңбегінің нәтижесі екенін тағы бір мәрте көрсетті.

«Мен мұндай іс-шараларға алғаш рет қатысып отырмын. Футбол және волейбол турнирлеріне қатысып, нәтижесіне өте ризамын. Барлығы жақсы дайындалып, бір-біріне қолдау көрсетіп, қарсыластарына соңына дейін дес бермеді. Мұнда спорт саласында күн сайын еңбек етіп жүрген адамдар жиналғандықтан, бәсекелестік те жоғары болды.

Бұл біз үшін жай ғана жарыс емес, өзімізді сынап, командалық рухты сезініп, Спорт күнін бірге атап өтудің жақсы мүмкіндігі. Осындай мерекелік шара ұйымдастырғаны үшін ұйымдастырушыларға, ал лайықты бәсеке көрсеткен барлық қарсыластарымызға алғыс айтамын», – деді жарысқа қатысушы Ақжол Тәмен.

Тартысты әрі тартысқа толы бәсекенің қорытындысы бойынша жалпы командалық есепте 1-орынды «Жігер» олимпиадалық спорт түрлері бойынша мамандандырылған балалар-жасөспірімдер спорт мектебінің қызметкерлері иеленді. 2-орынға Кеген ауданының балалар-жасөспірімдер спорт мектебінің өкілдері жайғасса, 3-орынды облыстық спорттық жекпе-жек түрлері бойынша мамандандырылған балалар-жасөспірімдер спорт мектебі жеңіп алды.