Ұстаздан — жаңа чемпиондарға дейін

Алматы облысының Талғар ауданында Қазақстан республикасының еңбек сіңірген қайраткері, Қазақстан республикасының еңбек сіңірген жаттықтырушысы, «Құрмет» орденінің иегері, КСРО спорт шебері Тұрсынғали Еділовтың жүлдесіне арналған бокстан V ашық республикалық турнир өтті.

Талғар аудандық №2 балалар-жасөспірімдер спорт мектебінің рингіне Қазақстанның өңірлерінен, Алматы қаласынан және Қырғыз республикасынан 2011–2012 жылдары туған 200-ден астам жас боксшы жиналды. Жас спортшылар 42 келіден 80 келіден жоғары салмақ дәрежесіне дейінгі 15 салмақта жүлделерді сарапқа салды.

Жарыстың ерекше мәнге ие болуының бір себебі — оның Тұрсынғали Еділовтың есімімен байланысты болуы. Оның жаттықтырушылық жолы қазақстандық бокс тарихындағы ең жарқын белестердің бірімен тығыз байланысты.

2000 жылы Сиднейде өткен Олимпиада ойындарында Тұрсынғали Еділов жетекшілік еткен Қазақстан құрамасы тарихи нәтижеге қол жеткізді. Отандас боксшылар бірден төрт салмақ дәрежесінде финалға шығып, екі алтын және екі күміс медаль жеңіп алды. Бұл нәтиже бүгінде де Қазақстан боксының бір Олимпиададағы теңдессіз жетістігі болып қала береді.

Бүгінде даңқты ұстаздың жанында — үлкен спортта өз есімдерін енді ғана қалыптастырып келе жатқан жаңа буын спортшылары. Олардың алдында республикалық, халықаралық және Олимпиада ареналарында өздерін таныту міндеті тұр.

Турнирдің ашылуында жас спортшыларға ақжолтай тілегін білдірген Тұрсынғали Еділов чемпион болу жолы бір ғана жеңістен емес, күнделікті еңбектен басталатынын атап өтті.

«Мен әрқайсыңызға бұл турнирде жеңіске жетуді ғана емес, боксқа деген шынайы сүйіспеншілікті тілеймін. Медаль — бір жарыстың нәтижесі, ал спорттық мінез жылдар бойы қалыптасады. Мықты қарсыластан да, жеңілістен де қорықпаңыздар және әр жекпе-жектен кейін міндетті түрде сабақ алуға тырысыңыздар. Жаттықтырушыларыңызды, ата-аналарыңызды және қарсыластарыңызды құрметтеңіздер. Араларыңызда болашақ Қазақстан және Олимпиада чемпиондары болуы мүмкін. Өздеріңізге сеніп, көп еңбектеніңіздер. Үлкен спортта бұдан басқа жол жоқ», — деді Тұрсынғали Еділов.

Ұстаздың бұл сөзі оның шәкірттері мен қазақстандық бокстың жаңа буынының өкілдері алдында айтылуымен ерекше мәнге ие болды. Турнирдің құрметті қонақтарының қатарында Олимпиада чемпионы Ермахан Ибраимов та болды. Оның спорттық жолы да Тұрсынғали Еділовтың есімімен тығыз байланысты.

«Тұрсынғали Еділов менің спорттық тағдырыма үлкен ықпал еткен адам. Ол маған бокс техникасын ғана емес, тәртіпті, мінезді, берілмеуді және өзіме сенуді үйретті. Осындай ұстаздар чемпиондарды тәрбиелейді. Бүгін жастардың боксқа деген қызығушылығын, көздеріндегі отты көріп, ерекше қуанып тұрмын. Әрқайсысына сәтті жекпе-жек, мықты рух және өз мүмкіндіктеріне деген сенім тілеймін. Ал жаттықтырушыларға айтарым: сіздердің еңбектеріңіз міндетті түрде нәтиже береді. Өйткені спортшының әрбір үлкен жеңісінің артында оның ұстазының орасан зор еңбегі тұрады», — деді Ермахан Ибраимов.

Жас боксшылар үшін бұл турнир шеберлік пен дайындық деңгейін саралайтын маңызды додаға айналды. Әрбір жекпе-жекте спортшылар жылдамдық, дәлдік, тактикалық ойлау және жоғары жинақылық танытуға тиіс болды. Жарыстың мықты құрамы жас боксшыларға өз деңгейін саралап, алдағы уақытта қай бағытта жұмыс істеу керектігін түсінуге мүмкіндік берді.

Турнир қорытындысында Алматы облысының құрамасы жоғары нәтиже көрсетті. Өңір спортшылары барлығы 52 медаль жеңіп алды. Оның ішінде 13 алтын, 14 күміс және 25 қола медаль бар.

Бұл нәтиже Алматы облысының командасын V республикалық турнирдің жалпыкомандалық медальдық есебінде бірінші орынға шығарды.

Өңір қоржынына алтын медаль әкелген спортшылар:

• 42 кг — Қоқан Бекзат;
• 44 кг — Бекбосын Алихан;
• 46 кг — Көбісін Нұрислам;
• 48 кг — Маулет Ерасыл;
• 50 кг — Жалғас Мұхаммедали;
• 52 кг — Сержанатұлы Бекарыс;
• ⁠54 кг — Асқарұлы Пейіл;
• 57 кг — Қалдыбай Мейіржан;
• 63 кг — Исмаилов Исламжан;
• 66 кг — Ахмед Мұхаммед;
• 70 кг — Кенесбай Мұрат;
• 75 кг — Нарматов Амиржан;
• 80 кг — Адилов Ильяр.

«Бұл жаста әрбір жекпе-жек — тек жаттығу барысында ала алмайтын үлкен тәжірибе. Біз үшін Талғарға еліміздің әр өңірінен мықты спортшылардың келгені маңызды. Бұл біздің боксшыларға өз деңгейін салыстырып, әлі де қандай бағытта жұмыс істеу керектігін түсінуге мүмкіндік береді. Жігіттер лайықты өнер көрсетті. Осы турнир көптеген спортшы үшін спорттық мансабындағы алғашқы маңызды қадамдардың бірі болатынына сенімдімін», — деді Алматы облысының жасөспірімдер арасындағы аға жаттықтырушысы Әли Камбаров.

Жарыс қорытындысында жеңімпаздар мен жүлдегерлер дипломдармен және арнайы медальдармен марапатталды. Сондай-ақ спортшыларға Қазақстан республикасының спорт шеберлігіне кандидат атағын беру жоспарлануда.

Тұрсынғали Еділовтың жүлдесіне арналған V республикалық турнир өз мәресіне жетті. Алайда оның мәні бір жарыстың нәтижесімен ғана шектелмейді.

Лилиана Штогрина