ҚАЖ саласында халықтар достығының мерекесі

Алматы және Жетісу облыстары бойынша ҚАЖ Департаментінде 1 мамыр – Қазақстан халқының бірлігі күніне арналған іс-шара өтті, деп хабарлайды Департамент баспасөз қызметі.

Қазақстан – жүзден аса ұлт пен ұлыстың бір шаңырақ астында тату-тәтті өмір сүріп жатқан бірегей ел. Бұл – бейбітшілік пен келісімді, сыйластық пен ынтымақты ту еткен мемлекетіміздің басты құндылықтарының бірі.

Осы ұстанымды басшылыққа алған Алматы және Жетісу облыстары бойынша Қылмыстық-атқару жүйесі департаменті 1 мамыр – Қазақстан халқының бірлігі күніне орай ерекше мәдени шара ұйымдастырды.

Мерекелік іс-шара аясында департамент қарамағындағы мекемелер мен жеке құрам қызметкерлері әртүрлі ұлт өкілдерінің ұлттық дәстүрлері мен мәдени құндылықтарымен танысты.

Шараның басты мақсаты – ел ішіндегі ұлтаралық келісімді дәріптеу, ҚАЖ саласындағы мәдени әртүрлілікті көрсету және ұлттар арасында бірлік пен татулықты нығайту болды.

Іс-шара барысында:

• ҚАЖД қазақ ұлтының салт-дәстүрін,
• №10 мекеме әзірбайжан халқының мәдениетін,
• №12 мекеме – орыс ұлтының ұлттық ерекшеліктерін,
• №14 мекеме – кәріс халқының әдет-ғұрыптарын,
• №49 мекеме – Беларусь мәдениетін,
• №57 мекеме – өзбек халқының салт-дәстүрін,
• №71 мекеме – ұйғыр ұлтының ұлттық мәдениетін көпшілік назарларына ұсынды.

Киім үлгілері, ұлттық тағамдар, салттық рәсімдер мен ән-билер арқылы қатысушылар өзге ұлттар туралы мол мағлұмат алып, Қазақстан халқының бай мәдени мұрасын тереңірек танып білді.

"Бұл бастама – ҚАЖ қызметкерлерінің да ел бірлігі мен тұрақтылықты нығайту жолындағы белсенді атсалысып жатқанын айқын дәлелдеді. Тәртіп пен талап қатаң сақталатын ортада осындай рухани бастамалардың жүзеге асуы – қоғамдағы жарасымды ахуалдың көрінісі", - деп атап өтті ҚАЖД бастығы Рысбек Тургумбаев.

Іс-шара соңында қатысу қызметкерлер Алматы қалалық Қазақстан халқы Ассаблеясының алғыс хаттарымен марапатталды.