Алматы облысында қазақ күресінен XXV республикалық турнир басталды

Алматы облысының Іле ауданында халық батыры, көрнекті қолбасшы Райымбек батырдың рухына арналған қазақ күресінен XXV республикалық турнир басталды.

Боз кілемге 2010–2011 жылдары туған 300-ден астам жас балуан шықты. Жарысқа еліміздің әр өңірінен 12 команда қатысып отыр.

Бұл турнирдің тарихы Іле ауданындағы Өтеген батыр ауылында өткен шағын аудандық жарыстан бастау алған. Осыдан жиырма бес жыл бұрын мұнда алғаш рет қазақ күресіне қызығушылық танытқан жас спортшылар бас қосты.

Уақыт өте келе жарыс алдымен облыстық, кейін республикалық деңгейге көтерілді. Бүгінде ол жүздеген жас палуанды біріктіріп, ұлттық күресті дамытуға үлес қосып келе жатқан маңызды спорт алаңдарының біріне айналды.

«Қазақ күресі – халқымыздың мәдени мұрасының бір бөлігі. Мұнда күш әрдайым мінезбен, төзімділікпен және қарсыласқа деген құрметпен қатар жүреді. Сондықтан Райымбек батырдың рухына арналған бұл турнирдің мәні ерекше. Ұлы қолбасшының есімі ерлік, қайсарлық және туған жерді қорғаудың символына айналды. Ал бүгінгі спорт алаңы жас ұрпаққа ұлттық спорт арқылы осы тарихпен жақынырақ танысуға мүмкіндік береді», – деді турнирдің салтанатты ашылу рәсімінде Алматы облысының дене шынықтыру және спорт басқармасының спорт инфрақұрылымын, бұқаралық және ұлттық спорт түрлерін дамыту бөлімінің басшысы Дулатбек Кусбеков.

Жарыстың қалыптасу тарихында қазақ күресінің ардагерлері – ұлттық күресті ұзақ жылдар бойы дамытып, өз тәжірибесін жас спортшыларға жеткізіп келе жатқан азаматтардың орны ерекше.

«Іле ауданында өтіп жатқан мерейтойлық турнир – жылдар бойы жалғасып келе жатқан тарих. Алғашқы аудандық жарыстан республикалық деңгейдегі бәсекеге дейінгі жол, ұстаздан шәкіртке жалғасқан сабақтастық, бір жеңістен келесі жеңіске ұласқан белестер – осының бәрі қазақ күресінің тарихын қалыптастырады.

Боз кілемде қазақтың ұлттық күресімен айналысатын жас балуандар белдесіп тұрған кезде, осыдан талай жыл бұрын қалыптасқан дәстүр де өмір сүруін жалғастыра береді. Ол – жастардың күш-қайратында, ұлттық мұраға деген құрметінде және қазақ күресінің тарихына өз есімдерін әлі жазатын жаңа буынның жеңістерінде», – деді қазақ күресінің ардагері, Іле ауданының балалар-жасөспірімдер спорт мектебінің директоры Қапар Рауанов.

Мерейтойлық XXV турнирге 15–16 жастағы жасөспірімдер қатысып, тоғыз салмақ дәрежесінде – 50 келіден 90 келіден жоғары салмаққа дейінгі аралықта жүлделерді сарапқа салады. Жас спортшылар үшін бұл – мықты қарсыластармен белдесіп, өз мүмкіндіктерін сынау, ірі жарыстарда тәжірибе жинақтау және спорттық биіктерге бастар тағы бір қадам жасауға мүмкіндік.

«Мен бұл жарысқа жай ғана қатысу үшін емес, соңына дейін күресу үшін келдім. Мұнда мықты қарсыластар бар, сондықтан әр белдесу – үлкен сынақ. Жаттығуда үйренгендерімнің барлығын көрсетуге тырысамын. Әрине, жеңіс тұғырына көтерілгім келеді», – деді жарысқа қатысушы, Алматы қаласының спортшысы Нұрдәулет Садықов.

Финалдық белдесулер екі күннен кейін өтеді. Жарыс қорытындысы бойынша әр салмақ дәрежесінде жеңімпаздар мен жүлдегерлер анықталады. Үздік спортшылар медальдармен және дипломдармен марапатталады. Әр салмақ дәрежесінде 1-3 орын алған балуандарға Қазақстан республикасының спорт шеберлігіне кандидат атағы беріледі.