Қаскелеңде киокушинкай-кан каратэден кумитэ бөлімінде Алматы облысының чемпионаты мен біріншілігі мәресіне жетті.
Қарасай аудандық №1 балалар мен жасөспірімдер спорт мектебінің татамиіне облыстың әр өңірінен 300-ден астам жас спортшы шықты.
Біреулер үшін бұл спорт күнтізбесіндегі кезекті жарыс болса, енді бірі үшін – алғашқы маңызды сынақ. Ал көптеген спортшы үшін маусымның басты мақсатына бір қадам жақындауға мүмкіндік болды. Яғни Алматы облысының құрама командасына іріктеліп, 3–4 қазанда Астана қаласында өтетін республикалық жарыстарда өңір намысын қорғау.
Жарысқа қатысушылар ұлдар мен қыздар арасында төрт жас ерекшелігі және 25 салмақ дәрежесі бойынша бақ сынады. Мамандардың айтуынша, жарыстың ерекшелігі – түрлі жастағы спортшылардың бір татами төрінде тәжірибе жинақтауы. Олардың арасында спортқа енді қадам басқан жас каратистермен қатар, жарыс тәжірибесі мол жасөспірімдер де бар. Бірі үшін бұл алғашқы маңызды бәсеке болса, енді бірі үшін спорттық мансабындағы кезекті баспалдақ.
"10–11 жастағы ең жас каратистерде жекпе-жек мәдениеті біртіндеп қалыптасады. Олар дұрыс қозғалу, эмоцияны бақылау, тактиканы сақтау және қарсыластан қаймықпауға үйренеді. 12–13 жаста техника мен тактиканың, сондай-ақ жекпе-жек барысында өз бетінше шешім қабылдай білудің маңызы артады. Ал 14–15 жастағы каратистер үшін облыстық чемпионат – спорттық шеберлікті айқындайтын маңызды сынақ. Дәл осы жаста спортшының дайындығы, физикалық төзімділігі, тактикалық ойлауы және жекпе-жектің жоғары қарқынына төтеп бере алуы анық көрінеді.
16–17 жастағы спортшылар үшін әрбір жарыстың маңызы ерекше. Жасөспірімдер спорты ересектер деңгейіне өтудің маңызды баспалдағына айналады. Бұл кезеңде тұрақтылық, тәжірибе, мінез және жоғары деңгейде бәсекеге дайын болу алдыңғы орынға шығады", – деді Алматы облысының киокушинкай-кан каратэден аға жаттықтырушысы Бекжан Сүнбеков.
Әр финалдық жекпе-жек спортшылар мен олардың жаттықтырушыларының татамиге шығар алдында атқарған ауқымды еңбегінің нәтижесіне айналды.
Айта кетейік, жарыста ең көп алтын медальді Қарасай ауданының спортшылары жеңіп алды.
Ұлдар арасында өз жас және салмақ дәрежелерінде үздік атанғандар: Сабит Қосанов, Ерсұлтан Қалижан, Дияс Мұхамеджан, Ұлан Мұқаммет, Ернұр Закарья, Ілияс Сағат, Сұлтан Марат, Исатай Қуатбаев.
Қыздар арасында үздік нәтиже көрсеткендер: Айлуна Быченко, Ұлболсын Борибай, Зере Бауыржанқызы, Жаннұр Үмітғали, Жаннұр Борибай, Баянсұлу Бақтыгүл және Айым Мелдебек.
Лилиана Штогрина