Мінездің мықтылығы. Данил Устинов көшпенділер ойындарында екі медаль жеңіп алды

Алматы облысының өкілі Данил Устинов тағы да үлкен жеңістердің кездейсоқ келмейтінін дәлелдеді. Қырғызстанда өтіп жатқан VI Дүниежүзілік көшпенділер ойындарында қазақстандық армрестлингші тұғырға екі рет көтеріліп, алтын және күміс медаль иеленді.

3 қыркүйек Данил Устиновтың спорттық мансабындағы тағы бір жарқын күнге айналды. 80 келіге дейінгі салмақ дәрежесінде армрестлингтен сынға түскен спортшы екі қолдағы бәсекелерде де сәтті өнер көрсетті. Сол қолмен күресте жеңімпаз атанса, оң қолмен күресте күміс жүлдеге ие болды.

Бұл нәтиже спортшы үшін кездейсоқ келген бір реттік жетістік емес, халықаралық аренадағы тұрақты әрі сенімді өнерінің жалғасы.

Данил Устинов бүгінде қазақстандық армрестлинг мектебінің мықты өкілдерінің бірі ретінде танылған. 2022 жылы ол 70 келіге дейінгі салмақ дәрежесінде әлем чемпионатында екі қол бойынша да күміс жүлдегер атанды. Бір жылдан кейін әлем біріншілігінде алтын және қола медаль жеңіп алды. Ал 2024 жылы 75 келіге дейінгі салмақта оң қолмен күрестен әлем чемпионы атанып, сол қолмен күрестен қола жүлдеге ие болды.

Биылғы жыл да спортшы үшін айрықша табысты болды. Азия чемпионатында Устинов бірден екі дисциплина бойынша жеңіске жетті: 80 келіге дейінгі салмақта оң қолмен күрестен және 85 келіге дейінгі салмақта сол қолмен күрестен алтын медаль иеленді.

Енді оның жеңісті шежіресіне Көшпенділер ойындарынан алған тағы екі халықаралық жүлде қосылды.

Құрғақ статистиканың ар жағында — жылдар бойғы жаттығу, мыңдаған қайталау, қатаң бәсекелестік және шешуші сәтте бар күш-жігерін жинақтай білу қабілеті тұр. Дәл осы қасиеттер Алматы облысының спортшысына әлемдік деңгейдегі додаларда тұрақты түрде жүлделі орындар үшін күресуге мүмкіндік беріп келеді.

Бүгінде Данил Устинов — тек атақты спортшы ғана емес, сонымен қатар өз тәжірибесін жас ұрпаққа үйретіп жүрген жаттықтырушы. Оның алғашқы халықаралық жарыстардан бастап әлем және Азия чемпионаттарындағы жеңістерге дейінгі спорттық жолы шәкірттеріне бір маңызды қағиданы көрсетеді: шынайы нәтиже талант пен күнделікті еңбектің тоғысқан жерінде дүниеге келеді.

Лилиана Штогрина